- 308 -

1378. Dez. 2. Liegnitz.

Herzog Ruprecht verreicht für sich und als Vormund seiner Brüder dem liegnitzer Bürger Hanke Kranch die von Margarethe, Ehefrau des jungen Georg von Brockotendorf erkaufte Hälfte des Dorfes Prinkendorf

In gotis namen amen. Wir Ruprecht von gots genadenn herczog yn Slezien vnd herre czu Legnicz bekennen vffinlich vnd ewiclich mit desim briue allin, die en vmmir gesehin, adir gehorin lesin, daz vor vns komen ist die ersame frow Margareth eczewenne Jung Georgen von Brockottendorph eeliche housfrouwe, gesund an lyebe vnd an vornunft, vnd mit er Junghannes yn err vormundeschaft vnd hat vnbetwungin vnd vnbetrogin mit dez selben errez vormunden loube vnd rate rechtlich vnd redelich vnd ewiclich vorkouft vnd vfgelosin daz dorph Premkendorph halb vnsers Legnitschen wyechbildiz mit der helfte alle synir czugehorunge, nichtis ousczunemen, czu allim rechte vnd herschaft vnd fryheyt, alz ez an see komen ist vnd geerbit, by namen daz vorwerk halp mit der helfte dez houez der wonunge, mit der helfte der poschmol vnd mit der helfte alle erre czugehorunge, by namen mit der helfte allir gehowde, eckere, possche, wesenn, gartenn, czinse, getreydiz vnd pfenninge vnd welirley die syn, mit allir vihtrift vnd schepherye helfte, und mit der helfte allir wassere, grabenn, wassirloufenn, vissheryenn, vnd mit der helfte der herschaft vnd des gerstenczinses vff der moel yn deme dorfe doselbist, dessen drye maldir syn, vnd mit der helfte czehindhalbiz fierdungis grosschenn ierlichs czinsis, den see gehabt hat vff eynir hufen obirschar, diede gelegin ist czwischin Premkendorph, Slotenik vnd dem Nowdurphe vnd by namen, mit vollir fryheyt vnd macht, die molgrabeen vnd die uvere czu fegin vnd czu vertigin, czu bouwin vnd czu bezsirn, yn allin reyenn vnd greniczenn, als daz gut gelegin ist mit alle synen fruchtenn vnd nuczberkeyt, vnsin getrouwin lieben Hanken Kranch, borger czu Legnicz vnd alle synen elichen erbenn vnd rechtin nochkomlingenn erblich vnd ewiclich czu habin vnd czu besiczen, vnd domete czu tun vnd czu losin, wie em daz behagit allirbeste. Ouch is doselbist yn vnser keginwortekeyt komen Caspar eczwenne Yesken Vogtis soen von Legnicz wolmundisch vnd hat mit gutim willen geliebit vnd gelobit, daz Junghannes yn syne vormundeschaft, den wir em czu rechtin vormunden hattin gegebin, vorkouft hat die helfte an deme obgenante dorffe Premkendorph, di syn vatir an en hatte geerbit, Hanken Kranche, deme obgenanten vnd synen erben, vnd dez selben dorphis helfte hat her nv also czu deme mole williclich vfgelosin, vnd wir habin durch err allir bethe, wille vnd dienste von vnsyr selbiz wegin vnd von der hochgebornen vorstenn .. herczogenn Wenczlaws, Bonczlaws vnd Heynrichs wegin; vnsyr lieben brudire, diede von gots genaden ouch . . herczogenn syn yn Slezien vnd mit vns erbherren czu Legnicz, daz obgenante dorph Premkendorph gancz vnd gar, mit allim rechte, herschaft, gerichte, fryheyt, fruchtberkeyt vnd geniesenn yn allin reynn vnd greniczen, alse ez gelegin ist mit alle syne czugehorunge, nichtis ousczunemen, alze ez eczewenne Caspar der obgenante halp vnd frow Margareth die obgenante halp gehabt han vnd beseczin, by namen mit allen gebowdenn, ickernn, molhenn, wassernn, visscheryenn, grabenn vnd üvernn mit posschenn vnd wesenn, mit schepherye vnd mit allir vihtrif, vnd sunderlich die Poschmol mit alle err czugehorunge mit allin czinsenn, iz sy an pfennungczinsenn adir getreydczinsenn, by namen vff der mol ynm dorphe sechsse maldir ierlichs gerstenczinsis, vnd czehindhalbin fierdung vff der obgenante huben obirschar rechtis erbczinzes Hanken Kranche vnd alle synen eelichin erbenn vnd rechtin nochkomlingenn gelehin vnd gereychit czu rechtim erblehne erblich vnd ewiblich czu habin vnd czu besiczin, czu vorkoufin vnd czu vorgebin vrid domete czu tun vnd czu losin, wie enn daz behagit allirbeste. Dez czu ewegir sicherheyt han wir enn desin brieff gegebin vorsegilt mit vrtserm gemeynen yngesegil czu Legnicz noch Crists geburde vnsers liebin herren dryczehinhundirt jare ynm acht vnd sebinczegstin jare' amn donirstage noch sancte Katherynn tage. Doby syn gerwest vnser getrouwen liebin er Hans von Schellindorph, Henschil vnd Tamme gebrudir von Redernn, Hans von Slewicz, Hannes Schellindorph von Petirsdorph vnd Thomas Gyethan vnser cappellan vnd schryeber, deme wir desin brief beuolin.

O. d. St, L. No. 149. Das Siegel an rotseidener Schnur.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866